Alltaf eitthvað um að vera í DK

    Þetta er líka síðasta vikan okkar Knúts í sumarfríi og höfum við sko haft það mega gott. Hann er búinn að fá mikla og góða þjálfun í íslenskunni, þó að sum orð séu nú ennþá auðveldari að segja á dönsku. T.d. er ein setning mjög mikið notuð en það er "laver du pabbi?" og svo þegar hann vill vita hvar einhver er þá segir hann t.d. "Ada hen?" (Ada = Aníta). En við reynum að sjálfsögðu bara að vera dugleg við að endurtaka á íslensku, það sem hann segir. Klósettþjálfunin gengur nú alveg vonum framar og hefur hann átt nokkrar þurrar nætur og hefur meira að segja vaknað upp á nóttunni til að pissa. Auðvitað koma fyrir slys annað slagið og þá helst ef það er mikið að gera hjá honum að leika eða hann er upptekinn við að eltast við það sem systur hans eru að gera.

    Stelpurnar eiga þessa og næstu viku eftir af sínu sumarfríi. Þessar tæpu þrjár vikur á Íslandi voru æðislegar hjá þeim og komu þær sko rétt rúmlega alsælar heim aftur. Þeim fannst auðvitað gott að koma heim, en þær myndu sko hiklaust skella sér í aðra svona ferð fljótlega ef það væri í boði. Ástarþakkir fyrir stelpuskotturnar okkar, þið á Íslandi!!! Við fórum öll þrjú keyrandi til Köben til að sækja þær, síðasta þriðjudag og það tók nú dágóðan tíma þar sem við þurftum að taka ansi mörg pissustopp, fyrir ungan herramann, á leiðinni, svo að það kom sér vel að hafa farið tímanlega af stað heheh... Svo kíktum við á Gulluna okkar (systurdóttir MÍN), sem er búsett í stórborginni og hjá henni var "litli" bróðir hennar hann Smári töffari. Við drógum þau með okkur út til að fá okkur aðeins að borða og svo ákváðum við bara að dóla okkur heim á leið þar sem við áttum nokkuð langa leið fyrir höndum, enda tók sú ferð svolítið á þreytta ferðalanga ;o)

    Og núna þegar sólin skín svona skemmtilega glatt hjá okkur þá getur maður nú ekki sleppt því að segja frá veðrinu, en það er hreinlega geðveikislega gott veður hjá okkur núna. Í gær var maður hreinlega að farast úr hita, en það má sko ekki kvarta þegar maður fær svona blíðu, bara njóta hennar og vera duglegur að kæla sig niður með vatni.

    Svona í tilefni dagsins, þá get ég nú ekki sleppt því að senda vinkonu minni afmæliskveðju, en það er hún Íris Brynja sem á afmæli í dag. Til hamingju  með daginn mín kæra!!!

    En þangað til næst vil ég biðja ykkur vel að lifa og fara varlega í að njóta sólargeislanna.

    Kv. Begga

    P.s. fyrir viku síðan skellti ég inn myndum, sem voru teknar í maí og júní, inn í myndaalbúmið mitt, endilega kíkið á þær þið sem hafið ághuga á því.

    Knútur nýtur þess nú bara að vera einkabarn, en spyr oft um systur sínar enda eru þær nú frekar stór og mikilvægur hluti í hans lífi. Og núna ef einhver spyr hann hvar þær séu, þá veit hann allt um það og svarar því til að þær séu á ÍSLANDI J Algjör krúttköggull!!!

    Stelpurnar eru búnar að vera í 9 daga af ferðinni á Seyðisfirði og líkaði það sko heldur betur vel. Núna eru þær í sveitinni og eiginlega efast ég ekki um að þær njóti lífsins í botn þar líka. Svo tekur Reykjavíkin við um helgina þar sem þær koma örugglega til með að hitta fullt af okkar fólki í viðbót. Svo á þriðjudaginn koma  þær aftur til Danmerkur og það er nú ekki laust við að maður sé farinn að hlakka mikið til að fá þær til okkar aftur.

    Af garðinum okkar er nú bara allt fínt að frétta, hann er orðinn ansi grænn og það er sko heldur betur farið að taka tíma að slá hann. Núna þurfum við að fara að skipuleggja hann, þ.e. hvar eigumvið að planta ávaxtatrjánum, hvar eiga þvottasnúrurnar að vera og hvað langar okkur að hafa meira??? En ætli við tökum okkur ekki bara góðan tíma í að velta þessu fyrir okkur og fáum okkur bara góðan göngutúr með sláttuvélina annað slagið. Svo eigum við náttúrulega eftir að helluleggja innkeyrsluna, en það er líka eitt af því sem kemur með tímanum.

    Núna ætla ég demba mér í að gefa gullklumpnum morgunmat fyrir enn einn rólegheitardag í fríinu.

    Njótið nú sumarsins...

    Kv. Begga